ممنوع لأصحاب القلوب الضعيفه!

يوم.. مش فاكره ملامحه , مش فاكره حد ولا تلات شهر ايه سنه كام !! تليفون من امى , مكانش التليفون اليومى المعتاد ,صوتها كله قلق انتى فين ؟؟ ماتنزليش , لا النهارده ولا بكره الجيش نازل دبح فى الناس عند ماسبيرو !

مرت ساعات بقلب فى تليفونى اخبار مشوهه ومشتته عن الجيش مدرعات قتلى جرحى 

اخدت لابتوب صاحبتى صور كتير كلها دم ومدرعات

صوره مكتوب عليها ممنوع لأصحاب القلوب الضعيفه فتحتها ........ مينا دانيال غرقان فى دمه جنبه مجموعه من الناس قلبت فى وشوشهم لكن معرفتش حد منهم 

واحده صحبتى شافت الصوره عندى جت جرى قلت يمكن تشاركنى اللحظه المره دى اللى فقدت فيها حتى القدره ع البكاء لقيتها بتقول ايه الصور اللى منزالها دى حرام عليكى مش عارفين ننام .........................................

مرت سنه واكتر شويه مر ألم كتيير دموع وحزن واكتئاب لكن مامرتش لحظه شبه لحظة ماعرفت ان مينا مات وانى مش هشوفه تانى

وفى يوم تانى مش فاكرله اى ملامح حد من اصحابى مش فاكره مين قالى جيكا مات اكلينيكيا ! قلتله جيكا مين ؟؟  ورغم انى شوفته قبل مايتصاب بساعات كأن عقلى كان رافض يستوعب اى صدمه جديده لغاية ماحد من اصحابى برضو اللى صدملى عقلى وقالى لأ تعرفيه, مقدرتش اعيش حالة الانكار تانى بس كان عندى أمل يخف ويعيش 

المره دى اتيحت لى الفرصه اودعه لأخر مره ,كانت المره الوحيده اللى شوفته فيها ساكت وعمرى ماكنت اتخيل اشوفه ساكت  بعد ساعات من زيارتى الاخيره ليه فى المستشفى انتشر الخبر نفس الصدمه بتتكرر من تانى _مينا مات ... جيكا مات وظهرت صوره جديده لصديق جديد عليها نفس العنوان المشئوم "ممنوع لأصحاب القلوب الضعيفه " وكأن اللى فى الصوره ماهماش قلوب ! 

وبعد ماكان التفكير فى عدم تكرار الموقف ده تانى , انى اشوف صورة حد من اصحابى تحت الجمله دى اللى ماتعرفش معنى الرحمه , بقيت بفكر ياترى مين الجاى , مين عليه الدور , مين اللى هيكتبولى فوق صورته :ممنوع لأصحاب القلوب الضعيفه"!